शुक्रबार, ११ असोज २०८१, दोलखा। आगामी मंसिर १६ गते हुने उपनिर्वाचनका लागि निर्वाचन आयोगले औपचारिक कार्यक्रम स्वीकृत गरेको छ। आयोगका प्रवक्ता नारायणप्रसाद सापकोटाका अनुसार, उम्मेदवारको मनोनयन दर्ता मंसिर २ गते बिहान १० बजे देखि बेलुकी ५ बजेसम्म निर्वाचन अधिकृतको कार्यालयमा हुनेछ।

त्यसपछि, सोही दिन बेलुकी ५ बजेदेखि ६ बजेसम्म उम्मेदवारको सूची प्रकाशन गरिनेछ। उम्मेदवारको विरोधमा उजुरी दिन चाहने व्यक्तिहरूले मंसिर ३ गते बिहान १० बजे देखि दिउँसो ३ बजेसम्म उजुरी दिन सक्नेछन्। उजुरी जाँचबुझ प्रक्रिया मंसिर ३ गते दिउँसो ३ बजेदेखि मंसिर ४ गते बेलुकी ५ बजेसम्म पूरा गरी अन्तिम नामावली प्रकाशन गरिनेछ।

निर्वाचन मंसिर १६ गते बिहान ७ बजेदेखि बेलुकी ५ बजेसम्म मतदान केन्द्रमा सम्पन्न हुनेछ। प्रचारप्रसार निषेध अवधि भने मंसिर १३ गते राति १२ बजेबाट सुरु हुनेछ, जुन मतदान सुरु हुनुभन्दा ४८ घण्टा अघि लागू हुने व्यवस्था छ।