रामेछापको दोरम्बा शैलुङ गाउँपालिका-३ लेखखर्कमा गएको पहिरोमा परेर ज्यान गुमाएका पाँच जनाको परिवारलाई संघीय र प्रदेश सरकारबाट राहत प्रदान गरिएको छ। पहिरोमा परेका पुडकी पहरी, सन्दिप पहरी, सन्तोष पहरी, चण्डिका थापा मगर, र आमोष श्रेष्ठको परिवारलाई संघीय सरकारबाट प्रति मृतक दुई लाख र प्रदेश सरकारबाट प्रति मृतक एक लाखका दरले राहत दिइएको हो।
तर, एकाघरमा एक भन्दा बढी मृत्यु भएको अवस्थामा प्रति मृतक डेढ लाख दिने व्यवस्था अनुसार, चण्डिका थापा र आमोष श्रेष्ठको परिवारलाई सोही दरले राहत प्रदान गरिएको छ। बाँकी मृतकको परिवारलाई राहत वितरणको लागि कानुनी प्रक्रिया पूरा गर्न बाँकी रहेको गाउँपालिकाले जनाएको छ।
भदौ ९ गते बिहानै गएको पहिरोले ११ जना वेपत्ता बनाएको थियो, जसमा ७ जनाको शव फेला परेको र एक जनालाई घाइते अवस्थामा उद्धार गरिएको थियो। दुई व्यक्ति अझै वेपत्ता छन्, भने पहिरोमा हराएकी विन्दा पहरीको खुट्टाको केही भाग फेला परेको छ, जसको पहिचान डिएनए परीक्षणबाट गर्ने तयारी भइरहेको छ।
